ENTREVISTAS A HOMES QUE AMAN O EUSEBIO DA
GUARDA.
Entrevista a Elisardo López Varela.
Mª R. S.:
Xa non recordo cantos anos estiveches no Instituto... Fainos partícipes
dalgunha grata lembranza, por favor.
-Estiven ao longo de dúas etapas. A primeira
como provisional, aló polos anos 1980-81. A segunda, debeu ser un pouco máis
tarde, talvez en 1988. Como director, desde 1991 até 2005 (case 14 anos). As
anécdotas foron tantas que o seu relatorio non caberia nestas páxinas. O máis
satisfactorio foi ter coñecido tantas e tantos compañeiras e compañeiros que se
convertirían posteriormente en amigas e amigos e que aínda hoxe conservo.
-Mellor a Inspección cá docencia, ou?
-Son dúas cousas diferentes. Na primeira prevalece
máis o carácter burocrático, sempre se bota de menos o contacto coa docencia. Ter
a oportunidade de comunicar o pouco ou moito que sabes ás novas xeracións
resulta enormemente satisfactorio. O bonito sería poder combinar ambas as
actividades.
-E o labor investigador que lugar ocupa na túa
vida? Contábasme este día que volverías escribir de boa gana sobre Curros, por
que, que achegarías á túa obra mestra sobre a obra do ourensán?
-Si, teño previsto retomar o tema. Achegaría
algúns aspectos aínda non coñecidos do grande público, fundamentalmente durantes
a súa estadía en Cuba. E acho tamén que resultaría conveniente actualizar algúns
aspectos xa publicados.
-Para investigar debidamente sobre o grande
poeta do Rexurdimento –Manuel Curros Enríquez- tiveches que viaxar a Cuba:
cóntanos algo do vivido alí, da xente, do material achado...
-Viaxei co meu director da tese, Xosé María
Dobarro aló polo ano 1995. Teño que lembrar que sempre existiu colaboración dos
responsábeis das bibliotecas cubanas connosco. As dificultades que achamos
viñeron dadas pola situación que naquela altura estaba atravesando o país. Non
dispuña do adecuado material técnico para levar a cabo a recolección da
documentación. Por exemplo, desde aqui levamos algunha peza clave para o
funcionamento das fotocopiadoras (lámpada, tóner...). Alén diso, os horarios
eran sempre matutinos e a calor asfixiante. Víamonos obrigados a madrugar bastante
para aproveitarmos o tempo, que pasaba voando.
Como anécdota, podo manifestar que anos
despois, a colección completa do xornal de que máis fotocopias fixemos, La Tierra Gallega, foi publicada íntegra
aquí no noso país e que chegou a min grazas a Manuel Rico. Aforraríanos moito
traballo se puidésemos dispór dela naqueles anos.
-A vida de Curros foi unha aventura, diso non
hai dúbida. En moitos sentidos el foi un home exemplar, con aquela fe inmensa
no Progreso, na Democracia, na Liberdade. Mais tamén foi un ser humano que tivo
que sufrir penas sen fin. Na túa coidada edición publicas a argumentación do
seu avogado aquí na Coruña para que o xuíz modifique a dura sentenza anterior.
Nesa argumentación lemos que xustifica certas palabras usadas por Curros
naqueles seus poemas que resultaran máis ofensivos aos oídos da xerarquía
eclesiástica, dicindo que hai que comprender que o dialecto é pobre e que carece do léxico necesario para expresarse
mellor... Velaquí un novo cálice cheo de fel que o vate debeu tragar. Que
opinas?
-Os avogados, como sabemos, recorren a
calquera argumento para tratar de defender o seu cliente. Debemos ter en conta
que a palabra dialecto no século XIX non tiña exactamente o mesmo
significado que ten agora. Chamarlle dialecto hoxe ao galego resulta ofensivo.
Naquela época, posibelmente non fose así.
-Agora, se mo permites, acabaremos volvendo ao
principio, ao noso amado Instituto. Cando eras Director recibiras a promesa
duns cincuenta millóns de pesetas para a necesaria reforma do edificio, diñeiro
que nunca deu chegado. Desas promesas de reformas integrais saben moito os
equipos directivos que seguiron ao teu. Na túa opinión, debemos aínda confiar
no progreso e mellora dun Instituto con tanta historia, cun elenco tan grande,
de personalidades relevantes na Historia de Galicia e mais de España...
Confiamos?
-Sempre hai que confiar. Ese é un edificio
emblemático e situado nunha das mellores zonas da Coruña. A súa restauración integral nunca resultará
barata. Entendo, pola miña experiencia, que hai elementos estruturais do
edificio que non se poderían obviar: muros, pedras, canalizacións e, sobre
todo, as bases, o sustento de todo o edificio. Non hai que esquecer que está
construído sobre unha superficie mol, areosa e moi próxima ao mar. Dúas claves
terán que se dar para que chegue ese momento: decisión política e investimento
económico.
-Grazas pola túa amabilidade e cariño que
sempre nos demostraches, aos membros do Claustro do Eusebio da Guarda.
Esperamos con ilusión as túas novas contribucións á Literatura Galega.
Ningún comentario:
Publicar un comentario